Details

About :

گفتگو پبلی کیشنز کے تحت ’’ایک کتاب – مکمل نصاب‘‘ کی پانچویں کتاب پیشِ خدمت ہے، جو چوتھی جماعت کے لیے مرتب کی گئی ہے۔ اس سلسلے کی گزشتہ چار کتب بالترتیب پری کے جی/کے جی، پہلی، دوسری اور تیسری جماعتوں کے لیے شائع کی جا چکی ہیں۔ ان کتابوں کی طرح زیرِ نظر کتاب میں بھی اردو، انگریزی، ریاضی، سائنس، جغرافیہ، اسلامیات، اخلاقیات، مالیاتی خواندگی (فائنانشیل لٹریسی) اور کمپیوٹر سائنس کے مضامین کو ایک ہی جلد میں پیش کیا گیا ہے تاکہ بچوں کو ایک جامع، مربوط اور متوازن نصاب فراہم کیا جا سکے۔ چوتھی جماعت میں پڑھنے والے بچے کی متوقع عمر عموماً 10 سے 11 سال کے درمیان ہوتی ہے۔ اس مرحلے تک وہ بنیادی تصورات سے اچھی طرح واقف ہو چکا ہوتا ہے، اس لیے اس کتاب میں تمام مضامین کو گزشتہ جماعت کے مقابلے میں مزید وسعت اور گہرائی کے ساتھ پیش کیا گیا ہے۔ ہمارا مقصد صرف معلومات فراہم کرنا نہیں بلکہ بچوں میں تجزیاتی سوچ، مسئلہ حل کرنے کی صلاحیت، تخلیقی اندازِ فکر اور عملی زندگی سے تعلق پیدا کرنا بھی ہے۔ مالیاتی خواندگی کے حصے میں اس مرتبہ بجٹ بنانے، ضروریات اور خواہشات میں فرق، ذمہ دارانہ خرچ، بچت کی منصوبہ بندی، بینکنگ کے بنیادی تصورات اور روزمرہ مالی فیصلوں جیسے موضوعات کو شامل کیا گیا ہے۔ ہمارا یقین ہے کہ اگر بچوں کو کم عمری ہی سے مالی معاملات کی بنیادی سمجھ دی جائے تو وہ مستقبل میں بہتر اور ذمہ دارانہ فیصلے کرنے کے قابل بن سکتے ہیں۔ اِن شاء اللہ، آئندہ جماعتوں میں ان موضوعات کو مزید عملی مثالوں اور جدید مالیاتی تصورات کے ساتھ آگے بڑھایا جائے گا۔ اسی طرح کمپیوٹر سائنس کے سیکشن میں کمپیوٹر کے بنیادی تصورات کو مزید وسعت دیتے ہوئے فائلوں اور فولڈرز کی تنظیم، محفوظ انٹرنیٹ کے استعمال، ڈیجیٹل اخلاقیات، جدید سافٹ ویئر کے استعمال اور ’’اسکریچ‘‘ (Scratch) پروگرامنگ لینگویج کے ذریعے مزید دلچسپ اور عملی کوڈنگ سرگرمیوں کو شامل کیا گیا ہے۔ ان سرگرمیوں کے ذریعے بچے منطقی سوچ، مسئلہ حل کرنے کی مہارت اور پروگرامنگ کی بنیادی سمجھ کو مزید مضبوط بنا سکیں گے، جو مستقبل میں کمپیوٹر سائنس اور جدید ٹیکنالوجی کی تعلیم کے لیے ایک مضبوط بنیاد ثابت ہوگی۔